ସମ୍ବଲପୁର : ବିଶ୍ୱ ଜଳ ଦିବସ ୨୦୨୬ ଅବସରରେ Youth4Water-India ପକ୍ଷରୁ ସମ୍ବଲପୁରର Indian Institute of Management (IIM) କ୍ୟାମ୍ପସରେ “ଆମ ଜଳାଶୟ, ଆମର ଗର୍ବ” ଥିମ୍ରେ ଏକ ଭବ୍ୟ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମଟି AJSA India, Dalma, Water Initiatives ଓ Mahanadi River Waterkeeper ଙ୍କ ସହଯୋଗରେ ଆୟୋଜିତ ହୋଇଥିଲା। ସନ୍ଧ୍ୟା ୪ଟାରୁ ୬.୩୦ଟା ପର୍ଯ୍ୟନ୍ତ ଚାଲିଥିବା ଏହି କାର୍ଯ୍ୟକ୍ରମରେ ଯୁବମାନେ, ସମାଜସେବୀ ଓ ବିଭିନ୍ନ ସଂଗଠନର ପ୍ରତିନିଧିମାନେ ସକ୍ରିୟ ଭାବେ ଯୋଗଦେଇଥିଲେ।
କାର୍ଯ୍ୟକ୍ରମରେ IIM ସମ୍ବଲପୁରର ନିର୍ଦ୍ଦେଶକ ପ୍ରଫେସର ମହାଦେଓ ଜୈସ୍ୱାଲ ମୁଖ୍ୟ ଅତିଥି ଭାବେ ଉପସ୍ଥିତ ରହିଥିଲେ। ଓଡ଼ିଶାର ‘ଜଳ ପୁରୁଷ’ ଭାବେ ପରିଚିତ ଓ Youth4Water-India ର ସଂସ୍ଥାପକ-ମେଣ୍ଟର ରଞ୍ଜନ ପଣ୍ଡା ଜଳ ସୁରକ୍ଷା ଓ ପରିବେଶ ସମ୍ବନ୍ଧୀୟ ଅଭିଯାନ ବିଷୟରେ ବ୍ୟାପକ ଆଲୋଚନା କରିଥିଲେ।
ଏହି କାର୍ଯ୍ୟକ୍ରମରେ ଉଦ୍ୟମୀ ଓ ଲେଖକ ଦେବୁ ପଟ୍ଟନାୟକ, ୟୁଏନ୍ ୱର୍ଲ୍ଡ ଫୁଡ୍ ପ୍ରୋଗ୍ରାମର ଅଗ୍ରୋନୋମିଷ୍ଟ ରାଜଶ୍ରୀ ପୁରୋହିତ ଓ AJSA India ର କାର୍ଯ୍ୟନିର୍ବାହୀ ନିର୍ଦ୍ଦେଶକ ମନୋରଞ୍ଜନ ବେହେରା ମଧ୍ୟ ଯୋଗଦେଇ ଜଳାଶୟ ସୁରକ୍ଷା, ପରିବେଶ ସନ୍ତୁଳନ ଓ ସମୁଦାୟ ଭିତ୍ତିକ ପଦକ୍ଷେପ ବିଷୟରେ ନିଜ ମତାମତ ରଖିଥିଲେ।
ଏହି ଅବସରରେ “ଆମ ଜଳାଶୟ, ଆମର ଗର୍ବ” ଥିମ୍ ଉପରେ କାର୍ଯ୍ୟ କରୁଥିବା ୨୫ ଜଣ ‘ଗ୍ରିନ୍ ପିକନିକ୍ ଫେଲୋ’ଙ୍କୁ ସମ୍ମାନିତ କରାଯାଇଥିଲା। ସେଥିସହ ‘ଗ୍ରିନ୍ ପିକନିକ୍ ଆୱାର୍ଡ୍ସ ସିଜନ–୪’ ଘୋଷଣା କରାଯାଇଥିଲା। Youth4Water-India ର ୭ ବର୍ଷ ପୂର୍ତ୍ତି ଉପଲକ୍ଷେ କେକ୍ କାଟି ଉତ୍ସବ ମଧ୍ୟ ପାଳନ କରାଯାଇଥିଲା।
କାର୍ଯ୍ୟକ୍ରମର ଶେଷ ଅଂଶରେ ଷ୍ଟାଣ୍ଡଅପ୍ କମେଡି, ନାଟକ, ଗ୍ରୁପ୍ ନୃତ୍ୟ ଓ ସୋଲୋ ନୃତ୍ୟ ମାଧ୍ୟମରେ ସାଂସ୍କୃତିକ ପ୍ରଦର୍ଶନ ଆୟୋଜିତ ହୋଇଥିଲା, ଯାହା ଦର୍ଶକମାନଙ୍କୁ ଆକର୍ଷିତ କରିଥିଲା।
ଶେଷରେ IIM ସମ୍ବଲପୁରର ପ୍ରଶାସନିକ ଅଧିକାରୀ ଅମୃତ ଫାଲ୍ଗୁନୀ ମହାନ୍ତି ସମସ୍ତ ଅତିଥି, ସହଯୋଗୀ ସଂଗଠନ ଓ ଅଂଶଗ୍ରହଣକାରୀଙ୍କୁ ଧନ୍ୟବାଦ ଜଣାଇ କାର୍ଯ୍ୟକ୍ରମର ସମାପନ କରିଥିଲେ।
