 |
| ଓଡ଼ିଶାରେ ସଡ଼କ ଉପରେ ବାଳି–ମାଟି ଖସିବାରୁ ଯାନଚାଳକମାନେ ଜୋଖିମରେ |
ଆଜତକ୍ ଓଡ଼ିଶା ବ୍ୟୁରୋ | କଟକ |
ସଡ଼କ ଉପରେ ବାଳି, ମାଟି, ପଥର, ମୋରମ୍ ଭଳି ନିର୍ମାଣ ସାମଗ୍ରୀ ଖସିବା ଯୋଗୁଁ ଘଟୁଥିବା ସଡ଼କ ଦୁର୍ଘଟଣାକୁ ନେଇ ରାଜ୍ୟ ପରିବହନ କର୍ତ୍ତୃପକ୍ଷ ଗଭୀର ଚିନ୍ତା ପ୍ରକାଶ କରିଛନ୍ତି। ଏହି ପରିପ୍ରେକ୍ଷୀରେ ପରିବହନ କମିଶନର–ସହ–ଚେୟାରମ୍ୟାନଙ୍କ ପକ୍ଷରୁ ସମସ୍ତ ସଡ଼କ ମାଲିକାନା ସଂସ୍ଥାଙ୍କୁ କଡ଼ା ନିର୍ଦ୍ଦେଶ ଜାରି କରାଯାଇଛି।
ସମ୍ପ୍ରତି ବାଳି ଓ ଅନ୍ୟାନ୍ୟ ନିର୍ମାଣ ସାମଗ୍ରୀ ବୋଝା ନେଇ ଯାଉଥିବା ଯାନବାହନରୁ ସଡ଼କ ଉପରେ ସାମଗ୍ରୀ ଖସିବା ଘଟଣା ବଢ଼ିଥିବାରୁ ସଡ଼କ ମସୃଣ ହେଉଛି। ଏହା ଫଳରେ ଦୁଇଚକିଆ ଓ ଛୋଟ ଯାନ ଚାଳକମାନେ ବେଶି ପ୍ରଭାବିତ ହେଉଛନ୍ତି ଏବଂ ଗୁରୁତର ଦୁର୍ଘଟଣା ଘଟୁଛି।
ନିର୍ଦ୍ଦେଶ ଅନୁଯାୟୀ NHAI, R&B, PWD, ନଗର ନିଗମ, ନଗର ପାଳିକା, NAC ଓ ଗ୍ରାମ ପଞ୍ଚାୟତ ସମେତ ସମସ୍ତ ସଡ଼କ ମାଲିକାନା ସଂସ୍ଥାମାନେ ନିଜ ଅଧିକାର ଅଞ୍ଚଳରେ ସଡ଼କ ସଫା, ନିୟମିତ ରକ୍ଷାବେକ୍ଷଣ ଓ ଅବୈଧ ଭାବେ ଖସିଥିବା ବାଳି–ମାଟିକୁ ତୁରନ୍ତ ସଫା କରିବାକୁ ବାଧ୍ୟ।
ସେହିପରି, ଦୁର୍ଘଟଣା-ପ୍ରବଣ ସ୍ଥାନରେ ସତର୍କତା ସୂଚକ ବୋର୍ଡ୍, ବ୍ୟାରିକେଡ୍, ରୋଡ୍ ମାର୍କିଂ ଓ ଆଲୋକ ବ୍ୟବସ୍ଥା ନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି। ଅବହେଳା ପ୍ରମାଣିତ ହେଲେ ସମ୍ବନ୍ଧିତ ଅଧିକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ସଚେତନ କରାଯାଇଛି।
ସାଧାରଣ ଲୋକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି ନିର୍ଦ୍ଦେଶକୁ ଅତ୍ୟାବଶ୍ୟକ ଭାବେ କଡ଼ାକଡି ଅନୁସରଣ କରିବାକୁ କୁହାଯାଇଛି।
