ନୂଆପଡ଼ା : ଉପନିର୍ବାଚନ ପ୍ରଚାର ଶେଷ ଦିନଗୁଡ଼ିକରେ ନୂଆପଡ଼ା ଜିଲ୍ଲାରେ ପ୍ରଚାର ତାପ ଶିଖରରେ ପହଞ୍ଚିଛି। ବିଜେଡି ସଭାପତି ଏବଂ ରାଜ୍ୟର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ନୂଆପଡ଼ା ଆସି ଭବ୍ୟ ରୋଡ୍ ଶୋ କରିଛନ୍ତି। ପ୍ରାୟ ୨ ଘଣ୍ଟା ବିଳମ୍ବରେ ଖରୀଆର ରୋଡ୍ ପୋଲିସ ଥାନା ପଛପଟିଆ ଅସ୍ଥାୟୀ ହେଲିପେଡରେ ଅବତରଣ କରି, ସେ ସିଧାସଳଖ ଦଳୀୟ ପ୍ରଚାର ବସରେ ଚଢ଼ି ରୋଡ୍ ଶୋ ଆରମ୍ଭ କରିଥିଲେ। ତାଙ୍କ ପୂର୍ବରୁ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ମଧ୍ୟ ରୋଡ୍ ଶୋ ମାଧ୍ୟମରେ ଜନସମ୍ପର୍କ ଯାତ୍ରା କରିଥିଲେ। ସୂର୍ଯ୍ୟନଗର, ଏକତା ଛକ ଏବଂ ନୂଆପଡ଼ାର ତିନିଟି ସ୍ଥାନରେ ନବୀନ ପଟ୍ଟନାୟକ ଜନସମାଗମକୁ ସମ୍ବୋଧିତ କରି ‘ସଂଖ’ ଚିହ୍ନରେ ଭୋଟ ଦେବାକୁ ଆହ୍ବାନ କରିଥିଲେ। ଜାତୀୟ ରାଜପଥର ଉଭୟ ପାର୍ଶ୍ୱରେ ନବୀନଙ୍କୁ ଦେଖିବା ପାଇଁ ହଜାରୋ ସମର୍ଥକ ଓ ଜନସାଧାରଣ ଭିଡ଼ ହୋଇଥିଲେ।
