ବେଲପଡ଼ା, (ତ୍ରିନାଥ ବାଗ) ବଲାଙ୍ଗୀର ଜିଲ୍ଲାର ବେଲପଡ଼ା ଥାନା ଅଞ୍ଚଳରେ ଘଟିଥିବା ଏକ ଚୋରି ଘଟଣାରେ ପୁଲିସ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏହି ଘଟଣା ଧୂମାଭଟା ଗାଁରେ ଘଟିଥିବା ବେଳେ ଗିରଫ ହୋଇଥିବା ଦୁଇ ଜଣଙ୍କ ନାମ ହେଉଛି ତେଜରାଜ ଓରଫ ରାଜ ରଣା ଓ ସଦାନନ୍ଦ ନାଏକ। ପୁଲିସ ସୂଚନା ଅନୁଯାୟୀ, ଗତ ୧୭ ତାରିଖ ରାତିରେ ଏହି ଦୁଇ ଅଭିଯୁକ୍ତ ଧୂମାଭଟା ଗାଁର ତ୍ରିଭୁବନ ବୁଡ଼େକଙ୍କ ଚାଷ ଜମିକୁ ଯାଇ ସେଠାରେ ଲାଗିଥିବା ପମ୍ପସେଟ୍ ଚୋରି କରିଥିଲେ । ପମ୍ପସେଟ୍ ଚାଷ କାମ ପାଇଁ ଅତ୍ୟାବଶ୍ୟକ ଥିବାରୁ ଏହି ଚୋରି ଘଟଣାରେ ଚାଷୀଙ୍କୁ ଅସୁବିଧା ହୋଇଥିଲା।ଚୋରି କରିବା ପରେ ଅଭିଯୁକ୍ତମାନେ ସେହି ପମ୍ପସେଟ୍କୁ ଗାଁର କମ୍ୟୁନିଟି ହଲରେ ଲୁଚାଇ ରଖୁଥିଲେ, ଯାହାଦ୍ବାରା କେହି ସହଜରେ ସନ୍ଦେହ କରିବେ ନାହିଁ। କିଛି ସମୟ ପରେ ତ୍ରିଭୁବନ ବୁଡ଼େକ ନିଜ ଜମିରୁ ପମ୍ପସେଟ୍ ହରାଇଯାଇଥିବା ଦେଖି ଖୋଜଖୋଜି କରିଥିଲେ। ପରେ ସେ ଏହା ସମ୍ବନ୍ଧରେ ବେଲପଡ଼ା ଥାନାରେ ଲିଖିତ ଅଭିଯୋଗ ଦେଇଥିଲେ।ଅଭିଯୋଗ ପାଇବା ପରେ ପୁଲିସ ଘଟଣାର ତଦନ୍ତ ଆରମ୍ଭ କରିଥିଲା। ତଦନ୍ଧ ସମୟରେ ପୁଲିସ ସନ୍ଦେହ ଆଧାରରେ ଦୁଇ ଜଣଙ୍କୁ ଧରି ପଚାରାଉଚାରା କରିଥିଲା। ପରେ ସେମାନେ ଚୋରି ଘଟଣାରେ ଜଡିତ ଥିବା କଥା ସ୍ବୀକାର କରିଥିବା ପୁଲିସ କହିଛି। ପୁଲିସ ଅଭିଯୁକ୍ତମାନଙ୍କ ପାଖରୁ ଚୋରି ହୋଇଥିବା ପମ୍ପସେଟ୍ ସହ ସୋଲାର ପ୍ଲେଟ୍ ଏବଂ ଗୋଟିଏ ଅଟୋ ଜବତ କରିଛି। ଏହି ଜବତ ହୋଇଥିବା ସାମଗ୍ରୀମାନେ ଚୋରି କାମରେ ବ୍ୟବହୃତ ହୋଇଥିବା ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି। ବେଲପଡ଼ା ଥାନାର ଆଇଆଇସି ଅନନ୍ତ ପ୍ରଧାନ ଏହି ସମ୍ପର୍କରେ ସୂଚନା ଦେଇ କହିଛନ୍ତି ଯେ, ପୁଲିସ ସଚେତନ ଭାବେ କାମ କରି ଏହି ଚୋରି ଘଟଣାକୁ ସଫଳତାର ସହିତ ଉଦ୍ଘାଟନ କରିପାରିଛି। ଏହି ଘଟଣା ପରେ ଅଞ୍ଚଳରେ ଲୋକମାନଙ୍କ ମଧ୍ୟରେ ଆଶ୍ବାସ ଫେରିଛି।ଏହି ଘଟଣା ଚାଷୀମାନଙ୍କ ପାଇଁ ଏକ ସତର୍କ ସନ୍ଦେଶ ମଧ୍ୟ ଅଟେ ଯେ, ନିଜର କୃଷି ଯନ୍ତ୍ରପାତିକୁ ସୁରକ୍ଷିତ ରଖିବା ଅତ୍ୟାବଶ୍ୟକ। ପୁଲିସ ମଧ୍ୟ ଏପରି ଘଟଣା ରୋକିବା ପାଇଁ ନିୟମିତ ପ୍ରହରା ଓ ତଦନ୍ତ କାର୍ଯ୍ୟ ଜାରି ରଖିବାକୁ କହିଛି।
